ฯ นโม ตสฺส ภควโต อรหโต สมฺมาสมฺพุทฺธสฺสฯ
อภิธมฺมปิฏก
สํคายนสฺส ปุจฺฉา วิสฺสชฺชนา
ปุจฺฉา – ปฐมมหาสํคีติกาเล อาวุโส ธมฺมสํคาหกา มหากสฺสปาทโย มหาเถรวรา โปราณสํคีติการา ปฐมํ วินยปิฏกํ สํคายิตฺวา สุตฺตนฺตปิฏเก จ ทีฆมชฺฌิมสํยุตฺตองฺคุตฺตรสํขาเต จตฺตาโร มหานิกาเย สํคายิตฺวา ตทนนฺตรํ กิํ นาม ปาวจนํ สํคายิํสุฯ
วิสฺสชฺชนา – ปฐมมหาสํคีติกาเล ภนฺเต ธมฺมสํคาหกา มหากสฺสปาทโย มหาเถรวรา โปราณสํคีติการา ปฐมํ วินยปิฏกํ สํคายิตฺวา สุตฺตนฺตปิฏเก จ ทีฆมชฺฌิมสํยุตฺตองฺคุตฺตรสํขาเต จตฺตาโร นิกาเย สํคายิตฺวา ตทนนฺตรํ อภิธมฺมปิฏกํ นาม ปาวจนํ สํคายิํสุฯ
ปุจฺฉา – อิมิสฺสมฺปิ อาวุโส ฉฏฺฐสํคีติยํ สกลญฺเจว วินยปิฏกํ สํคีตํ, เต จ จตฺตาโร มหานิกายาฯ กาโล ทานิ อาวุโส สมฺปตฺโต อภิธมฺมปิฏกํ สํคายิตุํ, ตสฺมาหํ ตํ ตตฺถ ปุจฺฉิตพฺพานิ ปุจฺฉิสฺสามิฯ อภิธมฺโม นาเมส อาวุโส เกนฏฺเฐน อภิธมฺโมติ วุจฺจติฯ
วิสฺสชฺชนา – ธมฺมาติเรก ธมฺมวิเสสฏฺเฐน ภนฺเต อภิธมฺโมติ วุจฺจติฯ